Խոր ցավով հայտնում ենք, որ 88 տարեկան հասակում Նյու Յորքում կյանքից հեռացել է Էդվարդ Պալասանյանը՝ Նորարար Փորձառական Արվեստի Կենտրոնի (ՆՓԱԿ) համահիմնադիրն ու հայ արվեստի և մշակույթի նվիրյալը:
Էդվարդ Պալասանյանը ծնվել է Իրանում, 1936 թվին: Ստացել է ճարտարապետի տիտղոս Թեհրանի համալսարանից (1963), Քաղաքաշինության Մագիստրոսի (1968), եւ քաղաքաշինության եւ տարածքազարգացման ասպարեզներում Փիլիսոփայության Դոկտորի (1975) տիտղոսներ ԱՄՆ-ի Փենսիլվանիա համալսարանից:
Պալասանյանը գրանցված է ՄԱԿ-ի համաշխարհային մասնագետների ցանկում:
1970 թվականից Իրանում հիմնել և ղեկավարել է ճարտարապետա-քաղաքաշինական խորհրդատվական հիմնարկ:
1980 թվականից Պալասանյանը ընտանիոք տեղափոխվել է ԱՄՆ:
1992 թվականից սկսյալ Պալասանյանը իր արհեստավարժական կյանքը լիովին նվիրել է ԱՄՆ-ում եւ Հայաստանում հայ համայնքներին: 1992 թվականին, Ուաշինգտոնում ստանձնել է Ամերիկայի Հայկական Համագումարի Վարչության Նախագահի պաշտոնը, 1993-1995, ներառյալ, Երեւանում ծառայել է, որպես Հայաստան Համահայկական Հիմնադրամի փոխտնօրեն եւ Շինարարական բաժնի պետ:
1996 թվականին ստանձնել է Հայաստան Հիմնադրամ ԱՄՆ-ի Գործադիր տնօրենի պաշտոնը, եւ 1997-1998 թվերին, Նյու Յորքում ծառայել է որպես արեւելյան Ամերիկայի Հայոց Առաջնորդարանի Գործադիր տնօրեն:
Պալասանյանը նաև աշխատել է կատարողական արվեստի բնագավարում: Պարսկական բեմում, որպես արհեստավարժ դերասան նա ներկայացել է Շեքսպիրի, Չեխովի, Փրոսփեր Մերիմեի, Լիլիան Հելմանի, Ջոն Բոյնտոն Փրիստլիի, եւ այլ հեղինակների թատերախաղերում: Նա նույնպես ասմունքել է Իրանում, ԱՄՆ-ում, եւ Անգլիայում, հայկական ազգային եւ համայնական միջոցառումներին:
1992-թվին Պալասանյանը, իր կնոջ, նկարիչ-բանաստեղծ Սոնիա Պալասանյանի հետ միասին, Երեւանում հիմնել է Նորարար Փորձառական Արվեստի Կենտրոնը (ՆՓԱԿ), որը լծված է հայ ավանգարդ արվեստը համաշխարհայաին բեմահարթակներում ներկայացնելու:
1995 թվականից Հայաստանի Հանրապետության մշակույթի նախարարության հանձնարարությամբ Պալասանյանները, ՆՓԱԿ-ի միջոցով Վենետիկի Համաշխարհային Արվեստի Բիենալեներում շարունակաբար կազմակերպել են Հայաստանի Հանրապետության տաղավարները, որը շարունակվել են մինչև 2009թ.:
1998 թվի սեպտեմբերից երջանկահիշատակ Գարեգին Առաջին Ամենայն Հայոց Կաթողիկոսի հանձնարարությամբ, որպես Մայր Աթոռ Սուրբ Էջմիածնի լիազոր ներկայացուցիչ, ղեկավարել է Երեւանի Սուրբ Գրիգոր Լուսավորիչ Մայր Եկեղեցու կառուցման աշխատանքները, այն, 2001 թվին, Հայաստանի Քրիստոնեության ընդունման 1700-ամյակի առթիվ ավարտուն վիճակի հասցնելու հանձնարարությամբ:
2002 թվականի հունիս ամսից մինչև 2009թ. մարտ ամիսը Պալասանյանը ստանձնել է ազգային բարերար Գերարդ Լ. Գաֆեսճյանի նվիրատվությամբ Երեւանի Կասկադ համալիրին կից կառուցվող արվեստի թանգարանի գործադիր տնօրենի ինչպես նաև թանգարանի շինարարության ղեկավարության և վերահսկողության տնօրինությունը (2008-2009թթ):
ՆՓԱԿ թիմի կողմից խորին ցավակցություն ենք հայտնում Էդվարդ Պալասանյանի տիկնոջը` Սոնյա Պալասանյանին, որդուն` Արնե Զ. Պալասանյանին, հարազատներին, ընկերներին և արվեստագետներին:
